सोलुखुम्बु — खुम्बु पासाङल्हामु गाउँपालिका वडा नम्बर ५ ले एक वर्षको अवधिमा  २४ लाख ५ हजार २१ रूपैयाँ ३४ पैसा राजस्व सङ्कलन गरेको छ। वडा कार्यालयले विभिन्न १४ वटा राजस्व शीर्षकअन्तर्गत उक्त रकम संकलन गरेको हो।  
   सङ्कलित राजस्वमध्ये सबैभन्दा बढी बहाल करको रहेको छ, जसबाट १० लाख ३८ हजार ६६२ रूपैयाँ ४२ पैसा राज्वश सङ्कलन भएको छ। यसैगरी व्यवसाय रजिष्ट्रेशन दस्तुरबाट ५ लाख ७१ हजार ६९० रूपैयाँ, पर्यटन शुल्कबाट ३ लाख १६ हजार रूपैयाँ तथा व्यवसाय करबाट १ लाख २५ हजार ९०० रूपैयाँ राजस्व उठेको छ।  
   वडा कार्यालयका अनुसार सम्पत्ति करबाट ८८ हजार ८७४ रूपैयाँ ६० पैसा, भूमिकर तथा मालपोतबाट ५८ हजार ४९४ रूपैयाँ ३२ पैसा, सिफारिश दस्तुरबाट ८४ हजार ९५० रूपैयाँ र नाता प्रमाणित दस्तुरबाट ३७ हजार ९०० रूपैयाँ सङ्कलन भएको छ। 
   यसका साथै व्यवसायले भुक्तानी गर्ने करबाट ५७ हजार ४०० रूपैयाँ, व्यक्तिगत घटना दर्ता दस्तुरबाट ११ हजार ५०० रूपैयाँ, अन्य सेवा शुल्क तथा बिक्रीबाट ९ हजार ३०० रूपैयाँ, अन्य दस्तुरबाट ४ हजार रूपैयाँ, परीक्षा शुल्कबाट १ हजार रूपैयाँ र कृषि तथा पशुजन्य वस्तुको व्यावसायिक कारोबारमा लाग्ने करबाट ७५० रूपैयाँ राजस्व सङ्कलन भएको छ।