सोलुखुम्बु — जिल्ला ट्राफिक प्रहरी कार्यालय सोलुखुम्बुले एक हप्ताको अवधिमा ३२ वटा सवारी साधनलाई कारबाही गरेको छ ट्राफिक नियमविपरित सञ्चालन भएका २ वटा अटो, १६ वटा जिप तथा कार, १ वटा टिपर, ३ वटा ट्याक्टर र ८ वटा मोटरसाइकललाई कारबाही गरिएको जिल्ला ट्राफिक प्रहरी कार्यालय सोलुखुम्बुले जनाएको छ। उक्त कारबाहीबाट कुल ३५ हजार रुपैयाँ राजस्व संकलन भएको छ।
   विशेष गरी मोटरसाइकल चालकहरूले हेल्मेट नगाई सवारी चलाउने, दुई जनाभन्दा बढी सवार गरेर जोखिमपूर्ण यात्रा गराउने तथा मादक पदार्थ सेवन (मापसे) गरी सवारी चलाउने गरेको पाइएकाले उनीहरूलाई नियन्त्रणमा लिई कारबाही गरिएको प्रहरीको भनाइ छ। यस्तै, अग्रिम (अघिल्लो) सिटमा चालकबाहेक दुई जनाभन्दा बढी मानिस राखेर हुइँक्याइने जिपहरू समेत ट्राफिक प्रहरीको कारबाहीमा परेका छन्।
   यसका साथै आवश्यक सवारी कागजात साथमा नराखी सवारी चलाउने, क्षमताभन्दा बढी सामान ढुवानी गर्ने ट्याक्टर तथा ट्रक र तोकिएको पार्किङ स्थलभन्दा बाहिर जथाभावी स्थानमा सवारी साधन पार्क गर्ने चालकहरूलाई समेत नियन्त्रणमा लिई कारबाही गरिएको छ। आगामी दिनहरूमा पनि सवारी दुर्घटना न्यूनीकरण र चुस्त ट्राफिक व्यवस्थापनका लागि अनुगमन र कारबाही प्रक्रियालाई अझ सशक्त बनाइने जिल्ला ट्राफिक प्रहरी कार्यालय सोलुखुम्बुले जनाएको छ।