सोलुखुम्बुः  ब्रोड पिक हिमालमा गएको हिमपहिरोमा परी ज्यान गुमाएका १० आरोहीको सम्झनामा मैनबत्ती बालेर श्रद्धाञ्जली अर्पण गरिएको छ। पाकिस्तानको राजधानी इस्लामाबादमा मुसलधारे वर्षाका बिच पर्वतारोही, कूटनीतिज्ञ र नागरिक समाजका प्रतिनिधिहरू पाकिस्तान स्पोट्र्स कम्प्लेक्सको खुला मैदानमा भेला भएर मृतकको आत्माको शान्तिको कामना गर्दै प्रार्थना गरेका हुन्। खोज तथा उद्धार टोलीले आठ जनाको शव फेला पारेर अभियान समाप्त गरेपछि यो श्रद्धाञ्जली सभा आयोजना गरिएको हो। दुई जनाको शव भने अझै फेला परेको छैन।
   उक्त दुर्घटना ३० जुलाईमा ब्रोड पिकको क्याम्प २ र ३ बिच करिब ६ हजार ६ सय मिटर उचाइमा हिमपहिरो गएपछि भएको थियो। चार वटा फरक टोलीका १० जना आरोही बगेर सयौं मिटर तल पुगेका थिए। बेलायती–नेपाली पर्वतारोही निर्मल पुर्जासहित नेपालका छ जना आरोहीहरूमा पुरबहादुर गुरुङ, निमा शेर्पा, किली पेम्बा शेर्पा (किलु), ग्यालु शेर्पा र नवाङ थिन्दु शेर्पा थिए । उनीहरूसँगै पाकिस्तानी आरोही सोहेल साखी, ओमानकी नधिरा अल–हार्थी, चीनका वाङ झोङ र अमेरिकाकी म्यालरी गिस पनि टोलीमा सामेल थिए। उद्धार टोलीले नवाङ थिन्दु शेर्पासहित आठ जनाको शव सफलतापूर्वक संकलन गरे पनि पाकिस्तानी आरोही साखी र अमेरिकी आरोही गिसको शव भने अझै फेला पर्न सकेको छैन।

    कार्यक्रममा पाकिस्तानका लागि नेपाली राजदूत रीता धितालले मैनबत्ती बालेर श्रद्धाञ्जली अर्पण गरिन्। फेला परेका सबै नेपाली पर्वतारोहीको शव काठमाडौं पठाइसकिएको उनले जानकारी दिइन्।
   उद्धार टोलीका नेतृत्वकर्ता खानले हिमालमा जीवितै भेट्ने आशा गरे पनि हिउँले गाडिएको अवस्थामा शवहरू फेला पार्नुपरेको चन्दै पीडा व्यक्त गरे। कठिन परिस्थितिमा डोरी र अस्थायी स्ट्रेचरको प्रयोग गरी शवहरू तल झारिएको उनले बताए।पाकिस्तानको अल्पाइन क्लबका अध्यक्ष इरफान अरशद खानले खराब मौसमका कारण हेलिकप्टर पुग्न नसक्दा उद्धारकर्ताहरूले पैदलै खोज तथा उद्धार कार्य जारी राखेको जानकारी दिए। अन्तर्राष्ट्रिय पर्वतारोहीहरूको यस टोलीमा नेपाल, ओमान, पाकिस्तान, चीन, बेलायत र संयुक्त राज्य अमेरिकाका नागरिकहरू सहभागी थिए।काराकोरम पर्वतशृङ्खलामा पर्ने ८ हजार ५१ मिटर अग्लो ब्रोड पिक विश्वको १२ औं अग्लो हिमाल हो।