सोलुखुम्बुः  सोलुखुम्बुको सोलुदुधकुण्ड नगरपालिका–११ गञ्जेडाँडामा भएको ४६ वर्षीय तोईबहादुर कटुवालको बीभत्स हत्या घटनाको अनुसन्धानका क्रममा प्रहरीले थप दुई जनालाई नियन्त्रणमा लिएको छ। सुक्ष्म अनुसन्धान गरिरहेको प्रहरी टोलीले साउन २५ गते एक १७ वर्षीय बालक र सोलुदुधकुण्ड नगरपालिका–११ तिङ्ला निवासी २१ वर्षीय बिनोद खड्कालाई शङ्कास्पद व्यक्तिको रूपमा पक्राउ गरेको हो।
   यसअघि प्रहरीले हत्या आरोपमा सोही स्थानका १९ वर्षीय रोशन भन्ने भुवनसिंह कार्कीलाई पक्राउ गरिसकेको छ। प्रारम्भिक अनुसन्धानका क्रममा मदिरा सेवनपछि उत्पन्न विवाद र रिसको आवेगमा कार्कीले चक्कु प्रहार गरी कटुवालको हत्या गरेको स्वीकार गरिसकेका छन्। गत साउन २३ गते बिहान अन्दाजी ७ः३० बजे कटुवालमाथि धारिलो हतियार प्रहार गरी हत्या गरिएको थियो। घटनामा अन्य व्यक्तिको पनि संलग्नता छ वा छैन र हत्याको थप मुख्य कारण के हो भन्ने विषयमा पक्राउ परेका दुवै जनालाई नियन्त्रणमा राखेर विस्तृत सोधपुछ तथा अनुसन्धान भइरहेको प्रहरीले जनाएको छ।