सोलुखुम्बुः  ब्रोड पीक हिमालमा कीर्तिमानधारी नेपालीहरूसहित १० आरोहीको मृत्यु भएको घटनालाई सगरमाथामा सन् २०१४ र सन् २०१५ मा लगातार भएका दुई भिन्न घातक दुर्घटनापछि नेपाली पर्वतारोहण समुदायले सामना गरेको सबैभन्दा ठूलो विपद्का रूपमा हेरिएको छ।
    नेपाल पर्वतारोहण सङ्घ (एनएमए) का पूर्वअध्यक्ष आङछिरिङ शेर्पाका अनुसार पाकिस्तानमा गएको यो हिमपहिरो व्यावसायिक आरोहणको समयमा नेपाली आरोही समुदायले देशबाहिर देखेको सबैभन्दा ठूलो एकल घटना हो। उहाँले समग्रमै पनि यो घटना सन् २०१४–१५ पछिको सबैभन्दा खराब दुर्घटना भएको बताउनुभयो। 
   उहाँका अनुसार पाकिस्तानका हिमालहरूमा लामो अनुभव र ज्ञान भए तापनि नेपाली आरोहीहरूलाई यसपटक भाग्यले साथ दिएको छैन। उहाँले त्यहाँका हिमालहरूमा हिमपहिरो आइरहने र छिटो छिटो मौसम फेरबदल भइरहने कुरा दुर्लभ नभएको र पर्वतारोहीहरूले त्यही अनुसार आफ्नो तयारी गरे तापनि यसपटक उनीहरूले नियतिलाई टार्न नसकेको बताउनुभयो।
    नेपालमा सन् १९५० को दशकबाट अग्ला हिमाल आरोहण हुन थालेको इतिहास छ र सन् १९५३ मा सगरमाथाको पहिलो सफल आरोहण भएपछि खुम्बु क्षेत्रमा पर्वतारोहणका गतिविधि ह्वात्तै बढेका थिए। तर त्यसअघि समेत नेपाली आरोहीहरूले अन्य देशमा भएका हिमाल आरोहणका हिस्सा हुने क्रममा ठूलाठूला विपत्तिमा परेर ज्यान गुमाएका थिए। यस घटनाको १२ वर्षअघि फर्केर हेर्दा सन् २०१४ मा पनि सगरमाथा आधार शिविरभन्दा थोरै माथिपट्टि खुम्बु आइसफलमा हिमपहिरो जाँदा १६ जना आरोहीहरूको मृत्यु भएको थियो।

   पर्वतारोहण क्षेत्रका अनुसन्धानकर्ता अनिश दाहालका अनुसार ब्रोड पीक दुर्घटनामा मृत्यु हुनेहरू विश्वस्तरमै विशेष पहिचान बनाएका व्यक्तिहरू हुनुले उनीहरूको रिक्तता पर्वतारोहण जगतमा झन् बढ्ता महसुस हुनेछ। उहाँले पूरा पर्वतारोहण जगत्लाई यस घटनाले हिमालमा निर्णायक कोही हुन्छ भने त्यो हिमाल नै हुन्छ भन्ने निर्मम तथ्य पुनः सम्झाएको बताउनुभयो।