सोलुखुम्बु ; राष्ट्रियसभामा नेकपा एमाले सांसद सोनाम ग्याल्जेन शेर्पाले सर्वोच्च शिखर सगरमाथा आरोहणका लागि रोयल्टी बढाउनुपर्ने माग गरेका छन्। बिहीवार राष्ट्रियसभा बैठकमा विनियोजन बजेटका विभिन्न शीर्षकमाथिको छलफलमा भाग लिँदै उनले उक्त माग गरेका हुन्। सांसद शेर्पाले यथास्थितिमा सगरमाथाको आरोहणलाई कायम राख्ने हो भने आगामी २० वर्षमा सगरमाथाको अवस्था राम्रो नरहने चेतावनी दिए।
सगरमाथालाई हीराको रूपमा चित्रण गर्दै सांसद शेर्पाले सरकारले यसलाई कौडीको मूल्य बराबर पनि महत्त्व नदिएको भन्दै आपत्ति जनाए। शेर्पाले भने,‘हीरालाई चाँदीको भाउँमा बेच्यौँ। अब सगरमाथालाई हीराको भाउमै बेच्नुपर्छ। सगरमाथाको रोयल्टी बढाउनुपर्छ। हिमाल चढ्ने भनेको पहाड चढ्ने वा हाइकिङ जाने जस्तो होइन। यस्तै अवस्था रहे २० वर्षमा सगरमाथा राम्रो कन्डिसनमा रहँदैन।’ सांसद शेर्पाले सरकारले हिमालको पर्यटनलाई महत्व नदिएको गुनासो पनि गरे।