सोलुखुम्बुः नेपाली कांग्रेसको जारी १५औँ राष्ट्रिय महाधिवेशनमा सोलुखुम्बुबाट निर्वाचित प्रतिनिधि सभा सदस्य प्रकाश सिंह कार्कीले केन्द्रीय सदस्य पदमा उम्मेदवारी दिने हुनुभएको छ। संसद् र संसदीय समितिका बैठकहरूमा सोलुखुम्बुका साथै राष्ट्रिय जनसरोकारका विषय उठाउँदै आउनुभएका कार्कीले पार्टीको केन्द्रीय नीति निर्माणमा भूमिका निर्वाह गर्न उम्मेदवारी दिने निर्णय गर्नुभएको प्रकाश सिंह कार्कीको सचिवालयले जनाएको छ । 
   हालै सम्पन्न सोलुखुम्बु जिल्ला अधिवेशनबाट ६४८ मत प्राप्त गरी खुलातर्फ महाधिवेशन प्रतिनिधिमा निर्वाचित हुनुभएका कार्कीले केन्द्रीय सदस्यका लागि महाधिवेशन प्रतिनिधिहरूसँग मत र सहयोगको अपिल गर्नुभएको छ। महाधिवेशनमा विभिन्न पदका लागि उम्मेदवारी घोषणा भइरहेका बेला कार्कीले पनि केन्द्रीय सदस्य पदमा उम्मेदवारी दर्ताको तयारी गर्नुभएको हो।