सोलुखुम्बुः सोलुदुधकुण्ड नगरपालिकाले नगर क्षेत्रभित्रका तोकिएका खोलाहरूबाट ढुङ्गा, गिट्टी, बालुवा लगायतका नदीजन्य पदार्थ उत्खनन, सङ्कलन तथा निकासीका लागि बोलपत्र (टेन्डर) आह्वान गरेको छ । 
   स्थानीय सरकार सञ्चालन ऐन २०७४ बमोजिम प्रारम्भिक वातावरणीय परीक्षण गरिएका र घाटगद्दी तोकिएका स्थानहरूबाट कोशी प्रदेश सरकारले निर्धारण गरेको प्रति घनफिट १० रुपैयाँ (भ्याट बाहेक) राजस्व दरका आधारमा बढाबढ प्रक्रियामार्फत बिक्री गर्न नगरपालिकाले  बोलपत्र (टेन्डर) आह्वान गरेको हो  । 
   नगरपालिकाले ६ वटा छुट्टाछुट्टै प्याकेज बनाएर बोलपत्र आह्वान गरेको छ । सालावेशी, सोलुखोला, जुनवेशी खोला (वडा नं. २), दुधकुण्ड खोला (वडा नं. २), सोलुखोला बोल्दोकदेखि थापाटोल (वडा नं. ४ र ५), सोलुखोला छुल्यामु क्षेत्र (वडा नं. ६), जोरबौद्ध तलको सोलुखोला क्षेत्र (वडा नं. ७) र सोलुखोला भदौरे तिङला क्षेत्र (वडा नं. ११) गरी कुल १५ लाख ७५ हजार ६९३ घनफिट नदीजन्य पदार्थ उत्खनन गरिनेछ। 
    यस ठेक्काको न्यूनतम ठेक्का अङ्क भ्याट बाहेक १ करोड ५७ लाख ५६ हजार ९३० रुपैयाँ निर्धारण गरिएको छ। १३ प्रतिशत मूल्य अभिवृद्धि कर (भ्याट) २० लाख ४८ हजार ४०० रुपैयाँ ९० पैसा थप भई कुल ठेक्का अङ्क १ करोड ७८ लाख ५ हजार ३३० रुपैयाँ ९० पैसा पुगेको छ।   बोलपत्रमा सहभागी हुन इच्छुक ढुङ्गा, गिट्टी, बालुवा उत्खनन तथा बिक्रीको इजाजतप्राप्त, नवीकरण भएको प्रमाणपत्र, मूल्य अभिवृद्धि कर प्रमाणपत्र र आर्थिक वर्ष २०८२÷०८३ को कर चुक्ता प्रमाणपत्र भएका फर्म वा कम्पनीहरूले एकमुष्ट वा प्याकेज अनुसार छुट्टाछुट्टै आवेदन दिन सकिने नगरपालिकाले जनाएको छ ।