सोलुखुम्बुः सोलुखुम्बुको तेन्जिङ हिलारी विमानस्थल, लुक्लामा असोज १ गतेदेखि ११ गतेसम्म १८४ वटा उडान भएका छन्। इलाका प्रहरी कार्यालय नाम्चेका प्रहरी निरीक्षक रुद्रकुमार गिरीका अनुसार उक्त अवधिमा १३१ वटा जहाज र ५३ वटा हेलिकप्टरले उडान भरेका हुन्।
  यस अवधिमा सीता, तारा र समिट एयरलाइन्सका जहाजले लुक्लामा नियमित उडान भरेका थिए। हवाई सेवामार्फत १७५२ जना विदेशी पर्यटक लुक्ला भित्रिएका छन् । उक्त संख्यामा पर्यटक भित्रिँदा चार सय १० जना पर्यटक हवाई सेवामार्फत लुक्लाबाट बाहिरिएका छन्।
   मौसम प्रतिकूल भएका कारण असोज १, २ र ९ गते भने उडान पूर्ण रूपमा प्रभावित भएको थियो। ती दिन मौसम बिग्रिएपछि कुनै पनि उडान हुन नसकेको प्रहरी निरीक्षक गिरीले जानकारी दिनुभएको छ। शरद् पर्यटकीय सिजन सुरु भएसँगै लुक्ला विमानस्थलमा हवाई चाप बढ्न थालेको छ।