सोलुखुम्बुः  जिल्ला प्रशासन कार्यालय सोलुखुम्बुले आर्थिक वर्ष २०८२÷०८३ मा एक हजार ७ सय २४  वटा राहदानी वितरण गरेको छ। वैदेशिक रोजगारी तथा उच्च अध्ययनका लागि विदेश जानेहरूको सङ्ख्या बढ्दै जाँदा राहदानी बनाउने सेवाग्राहीको सङ्ख्या पनि उल्लेख्य रहेको जिल्ला प्रशासन कार्यालयका सहायक प्रमुख जिल्ला अधिकारी देवेन्द्र सुवेदीले जानकारी दिनुभयो ।  उहाँका अनुसार राहदानी प्राप्त गर्नेहरूमध्ये ६६७ जना महिला र एक हजार ५७ जना पुरुष रहेका छन्।
   त्यसैगरी, राहदानीका लागि आवेदन दिनेहरूमध्ये ६६४ जना महिला र एक हजार २९ जना पुरुष रहेका छन्। नाबालक सिफारिस सेवातर्फ आर्थिक वर्षभर ७३ जनाले सेवा लिएका छन्। जसमध्ये ३७ जना बालिका र ३६ जना बालक रहेका छन्। यस्तै, सोही अवधिमा जिल्ला प्रशासन कार्यालय सोलुखुम्बुले तीन हजार १४ जनालाई नयाँ नागरिकता वितरण गरेको सहायक प्रमुख जिल्ला अधिकारी देवेन्द्र सुवेदीले बताउनुभयो ।