सोलुखुम्बुः   चाडपर्व नजिकिएसँगै जिल्ला प्रशासन कार्यालय सोलुखुम्बुले बजार अनुगमन गरेको छ । जिल्ला प्रशासन कार्यालय सोलुखुम्बु, घरेलु तथा साना उद्योग कार्यालय सोलुखुम्बु र जिल्ला प्रहरी कार्यालय सोलुखुम्बुको संयुक्त टोलीले बुधवार अनुगमन गरेको हो।
   सल्लेरीको जिरो प्वाइन्टदेखि आवाडाँडासम्म गरिएका विभिन्न ६७ वटा खुद्रा किराना पसल तथा मासु पसलहरुको अनुगमनका क्रममा करिब २३ हजार ६ सय ५० रुपैयाँ बराबरका अखाद्य तथा म्याद गुज्रिएका सामग्रीहरू बरामद गरिएको निमित्त सहायक प्रमुख जिल्ला अधिकारी भूपेन्द्र थापाले जानकारी दिनुभयो । 
   अनुगमन टोलीले भेट्टाएका पेय पदार्थ, पिठो, चाउचाउ, चिउरा, दाल, भुजा र प्राउन जस्ता म्याद नाघेका सामग्रीहरूलाई सोही दिन नष्ट गरिएको थियो । अनुगमनका क्रममा अधिकांश व्यापारीहरू संयमित पाइएको निमित्त सहायक प्रमुख जिल्ला अधिकारी थापाले बताउनुभयो। व्यापारीहरूले म्याद गुज्रिएका सामान आफैं हटाउने गरेको र केही छुटेका सामानहरू अनुगमनका क्रममा भेटिँदा समेत उहाँहरूले संयमता अपनाएको पाउँदा खुसी लागेको उहाँको भनाइ छ।
   चाडपर्वको समयमा उपभोग्य वस्तुको माग उच्च हुने भएकाले उपभोक्तालाई ठगी हुन नदिन र गुणस्तरीय सामान मात्र बिक्री वितरण सुनिश्चित गर्न बजार अनुगमन गरिएको प्रशासनले जनाएको छ। व्यवसायीहरूलाई म्याद नाघेका र गुणस्तरहीन वस्तु बिक्री नगर्न आग्रह गर्दै प्रशासनले यस्ता अनुगमन कार्यलाई आगामी दिनमा पनि निरन्तरता दिइने स्पष्ट पारेको छ।