सोलुखुम्बुः जिल्ला  प्रहरी कार्यालय सोलुखुम्बुमा गत साउन महिनाभर कुल १८ वटा विभिन्न प्रकृतिका मुद्दा दर्ता हुनुका साथै अदालतको फैसला कार्यान्वयनका क्रममा ५ जना फरार प्रतिवादी पक्राउ परेका छन्। दर्ता भएका मुद्दामध्ये १३ वटा सामान्य, ३ वटा गम्भीर र २ वटा जघन्य प्रकृतिका रहेका छन्। सोही अवधिमा चालु  १० वटा मुद्दाका १६ जना प्रतिवादीमध्ये १५ जनालाई प्रहरीले नियन्त्रणमा लिइसकेको छ भने १ जना अझै फरार रहेको  जनाइएको छ । 
   फैसला कार्यान्वयनतर्फ पक्राउ परेका ५ जना फरार प्रतिवादीहरूबाट कुल ११ वर्ष कैद सजाय भुक्तान गराइनुका साथै २ लाख २५० रुपैयाँ नगद जरिवाना असुल गरिएको छ। यसैगरी महिला, बालबालिका तथा ज्येष्ठ नागरिकविरुद्धका कसुरतर्फ दर्ता भएका ३ वटा मुद्दा नै महिला हिंसासँग सम्बन्धित रहेका छन्। उक्त अवधिमा बालबालिका तथा ज्येष्ठ नागरिकविरुद्ध र ठगी वा बैंकिङ कसुरजस्ता आर्थिक अपराधसम्बन्धी कुनै पनि मुद्दा दर्ता भएका छैनन्।
   नागरिक खोजतलास अभियानअन्तर्गत अघिल्लो समय हराएका १ जना पुरुष र २ जना बालिका गरी २ जनालाई सकुशल फेला पारी आफन्तको जिम्मा लगाइएको छ । जिल्लामा कानुनको कार्यान्वयन, अपराध नियन्त्रण र शान्तिसुरक्षाको स्थिति चुस्त राख्न प्रहरीले आफ्ना गतिविधि तीव्र पारिरहेको छ।