सोलुखुम्बु:  नेकपा (एमाले) सोलुखुम्बु जिल्ला कमिटीले पार्टी सङ्गठनलाई सक्रिय बनाउने तथा पार्टी जागरण अभियानलाई प्रभावकारी रूपमा अघि बढाउने उद्देश्यसहित आजबाट जिल्लाका स्थानीय तहहरुमा‘मिसन पार्टी जागरण अभियान’ सम्बन्धी कार्यशाला सञ्चालन सुरु गरेको छ ।

 नेकपा (एमाले) सोलुखुम्बु जिल्ला कमिटीका अध्यक्ष डुफकुमार बास्तोलाले दिएको जानकारी अनुसार जिल्लाका पाँच स्थानीय तहमा कार्यशाला सञ्चालन गर्न लागिएको हो।कार्यशाला सञ्चालन गरिने स्थानीय तहमा माप्यदूधकोशी, सोताङ, महाकुलुङ, सोलुदूधकुण्ड नगरपालिका र लिखुपिके गाउँपालिका रहेको छ ।  निर्धारित कार्यक्रमअनुसार  आज माप्यदूधकोशी गाउँपालिकाबाट सुरु भएको हो ।  सोताङ गाउँपालिकामा कात्तिक १२ गते बिहीबार, महाकुलुङ गाउँपालिकामा कात्तिक १३ गते शुक्रबार, सोलुदूधकुण्ड नगरपालिकामा कात्तिक १५ गते आइतबार र लिखुपिके गाउँपालिकामा कात्तिक १७ गते मंगलबार कार्यशाला सञ्चालन हुने छ ।